【明報專訊】就快61歲嘅醫管局質素及安全總監區結成下月正式退休，唔少人都知佢常以筆名「區聞海」出書，區醫生噚日同傳媒茶敘時就透露退休後會先預留半年時間寫書，最新著作暫名為《有詩的時候》，已寫咗3萬字，希望介紹中港台近代詩人同新詩發展，目標係下年書展面世。

區醫生話，自小就好喜歡讀詩同寫詩，覺得讀詩可以反映時代面貌，不過佢都擔心新詩無市場，所以9月開始小試牛刀，先喺醫管局舉辦咗兩場「午間詩語」講座，介紹近代詩人卞之琳同戴望舒嘅詩，第一次搞時有30幾人參加，第二次已經有近百人，區醫生話呢個已經係「明星級」詩人嘅講座人數，好滿足到自己嘅虛榮心，出年仲打算喺九龍中聯網搞第三場，反應好嘅話唔排除逐間醫院「巡迴」演講。佢仲好誠實咁講呢個係一個「陰謀」，為新著作儲吓讀者群，以免賣唔出喎。

負責管理質素及安全嘅區醫生呢幾年接觸唔少傳染病危機同醫療事故，佢就話諗唔起有咩深刻經歷，但自己嘅管理原則係避免一遇事故就過分緊張，用盡人力物力去堵塞一單事件嘅漏洞，到頭來只會影響其他工作，因此唔可以只照顧一棵樹，而係睇成片樹林有咩問題。𠵱家外科每年進行手術成效嘅監察，區醫生話成功靠數據搵出問題，腦外科、深切治療部等其他專科都會研究佢哋嘅審核模式改善質素。