【明報專訊】立法會內會噚日選出多個委員會嘅成員，當中大部分因為建制、泛民兩邊都無成隊人加入，參選選員唔使投票就自動當選。不過，噚日有13人參選只有12個位嘅議事規則委員會，議員就要用今年新設嘅平板電腦投票系統投票，雖然經民聯梁美芬(Priscilla)唔係議會新丁，但佢似乎未太熟悉運作，投票時舉手大嗌「唔識用」！

聽到黨友求救，林健鋒同秘書處職員即刻過去「英雄救美」，Priscilla面露尷尬笑容，但學咗10幾秒，最終成功投票。

其實投票系統唔止考起Priscilla，體育、演藝、文化及出版界馬逢國投票嗰陣，就問內會主席李慧琼(Starry)係咪不記名投票，話平板電腦顯示嘅嘢可以畀後面睇晒，Starry就話呢項投票係記名嘅。Starry可能見議員未熟習，噚日都有重複解釋新系統係點運作。

另外，公民黨陳淑莊噚日喺內會要求將對大會主席梁君彥嘅不信任動議，擺入下周三大會議程，佢質疑梁君彥向建制派「跪低」、推翻自己決定，但建制派認為動議唔迫切。Starry最終決定將陳淑莊嘅要求延到下次內會討論，亦即係不信任動議未可以喺下周三大會提出。