【明報專訊】「未來@香港」委託嶺大民調 特首選戰如箭在弦，前身係政改民意關注組、由民主黨李華明等人成立嘅「未來@香港」，委託嶺大訪問逾千名港人，要求佢哋自行提名一個特首人選，發現財政司長曾俊華得票率最高，有近兩成；特首梁振英就以4.9%排第2位；有「民間特首」稱號嘅藝人劉德華就排第6，高過新民黨主席葉劉淑儀(第7)。 「未來@香港」委託嶺南大學公共管治研究部，於今個月3至10號訪問1015人，問及「你希望誰當選下一任行政長官」，要求受訪者自行回答一個候選人嘅名字。調查發現，受訪者當中有201人提起「曾俊華」個名、得票率為19.8%，排第2係梁振英，之後係政務司長林鄭月娥(3.4%)；大明星劉德華同周潤發都榜上有名，分別排第6同第9位，另有兩個人提名立法會新丁議員朱凱廸。 五成半人不知道無意見 調查亦有1.6%受訪者認為「只要不是梁振英都可以」，有五成半人話「唔知道或無意見」、一個名都無答到。 召集人李華明提到，佢哋一年半前亦有類似民調，當時無人提起財爺個名，認為呢點幾有趣。至於有逾半數人連名都講唔出，成員之一嘅城大公共政策學系教授李芝蘭就估計，係同香港未落實有普選有關，加上現時無人正式宣布參選或提出政綱，都令市民難有想像。
|
| |
| |
;){kind=small}
