【明報專訊】內委會上星期五開會時，有非建制議員去信要求討論上周三立法會宣誓時嘅情况，好似秘書處角色等，內委會主席李慧琼嘅處理手法，令非建制議員極為不滿，又再出現包圍主席台嘅亂局。噚日非建制議員就聯署去信李慧琼譴責對方，但30名議員中只有19人參與聯署，比起「G27」(未計青政及熱血公民3名議員)呢個平台足足少咗8人。 不滿處理內會手法 非建制派噚日去信譴責李慧琼，信中批評李慧琼當日拖延、唔處理劉小麗等議員要求討論首次大會情况嘅信件，議員認為信件喺內委會會議上討論，係完全合乎規程，但李慧琼卻裁決內委會只能前瞻性處理立法會事務，唔可以覆檢已發生嘅狀况；但事實上過去立法會係有處理已發生嘅事，當時李慧琼亦有參與該次會議，非建制派批評對方係「選擇性失憶，缺乏議會常識」，強烈譴責對方不公正處理會議嘅手法。 今次參與聯署嘅包括民主黨、公民黨、公專聯、梁耀忠、李國麟、陳志全、邵家臻等19名泛民，被視為較激進嘅羅冠聰等無參與，連屬公民黨嘅毛孟靜亦無聯署。信中最後指為免有議員向李提出不信任議案，促請李日後主持會議時，以公平公正方式處理議員訴求，咁寫法，唔通主流泛民打算放生李慧琼，暫時唔對佢提不信任動議？
|
| |
| |
