奮鬥史言論惹批評 「兩年供斷樓」傑青：非只顧賺錢
【明報專訊】日做夜做，聲稱兩年供斷樓，出爐傑青黃仰芳(Fonia)嘅奮鬥史言論令佢成為網上紅人，網民紛紛人肉搜尋，質疑若因為佢賺錢上位而獲獎，咁係咪宣揚「賺錢至上」？Fonia同傑青首席評審胡定旭相識亦引起質疑，令主辦單位急急出聲明澄清胡定旭已申報及無參加評選。Fonia就同Emily講，否認自己一味搵錢拜金，對外界聚焦其供樓經歷「始料未及」。
40歲嘅Fonia前日獲傑青獎項時大談27歲買樓、29歲「供斷」嘅威水史，言論引來網民嘩然，部分人對比佢昔日訪問，指佢不同時期講嘅嘢都唔同。Fonia透露，朝九晚十一工作、儲錢供樓係發生喺25至29歲，掙錢買樓係畀家人安樂窩，但仍會做義工。佢2013年接受報章訪問時提及佢都會旅行，說法同佢前日形容自己供樓時無消費嘅版本唔同，Fonia噚日解釋，當年訪問係講緊佢已經供完樓後嘅生活，所以說法無牴觸。
就言論令人覺得佢多年來只為升職賺錢，Fonia話有啲失落，擔心誤令青年以為「賺錢先係成功」，「但我只係想分享成功要付出努力」。
佢又話，自己7歲來港，英數成績欠佳，無朋友、無自信，但中三起參加少年警訊，識到第一個朋友，喺義工活動建立自信及社交技巧；中五會考拎到19分時，更憑一系列社區服務嘉許狀，由Band 5中學跳到同區Band 1學校就讀，自言童年完全體會到參與社會服務可帶來改變。
稱創3平台助青年
Fonia話自己唔係淨係搵錢，又話過去10年創立中區扶輪社、香港青年領袖服務獎和少訊智庫，現時每周其中3晚及周末均處埋會務或出席活動，亦先後成為數十名青年嘅人生導師。佢話希望以自己故事激勵別人：「輸在起跑線」亦有機會成功。
主辦澄清胡定旭沒投票
對於提名人陳智思及胡定旭，來自潮州的Fonia承認識佢哋，同胡定旭有私下聯絡，因此跟傑青評審團見面時，胡已事先表明唔會投票，至於其他評審就無私下聯絡，電話都無交換。十大傑青選舉主辦單位國際青年商會香港總會亦發表聲明，指評審時胡定旭無參與跟黃仰芳相關嘅討論及投票。
