【明報專訊】新一屆立法會議員嘅履歷資料已上載至立法會網站，當中新民黨容海恩報稱嘅學歷及專業資格一欄，寫上「香港城市大學法學博士」，同佢一直所講嘅城大「法律博士」唔同，英文版更寫上「FD, City University of Hong Kong」，與法律博士嘅簡稱JD有出入。容海恩噚日回覆Emily，話佢於9月9日畀資料立法會，可能係助手寫錯，話係無心之失，今日即刻會向立會跟進。

立會網頁噚晚已改正

不過，Emily噚晚發現，容海恩嘅履歷中文版已改番「香港城市大學法律博士」，英文版亦改番JD。據城大網頁，「法學博士」課程需修讀3年全日制，係法學研究生課程；而「法律博士」只需修讀兩年全日制或三年半兼讀制，亦係供本科非法學畢業大學畢業生修讀嘅法律專業學位。容海恩話佢喺2004至06年修讀城大法律博士，好清楚「法律博士」與「法學博士」嘅分別，仲話點會攞呢啲嘢呃人。

事實上，立法會網站多名議員嘅資料仍未齊全，早前被質疑擁有碩士學歷嘅民建聯柯創盛，其議員履歷中嘅學歷及專業資格、職業、所屬政治團體全部留空。佢黨友葛珮帆亦一樣，今次無填博士學歷，學歷及專業資格一欄留白。

熱血公民鄭松泰喺學歷及專業資格一欄填上社會學博士，無寫明佢個學位來自北京大學。其英文版簡介，就將社會學嘅英文Sociology串錯為Sociolosy；屯門嘅英文Tuen Mun變咗Tuen 「Mum」，連選區英文都串錯，但呢兩個錯處噚晚已經改番。