【明報專訊】現屆立法會議員會喺今個星期五(30日)卸任，公民黨黨魁梁家傑(傑哥)也忙於執拾立法會嘅辦公室，準備「交吉」畀接班人譚文豪。傑哥話，要執拾12年來儲落嘅物品一啲都唔容易，仲煩緊點處置多年來收到嘅大批紀念座及錦旗等。不過，有兩樣物品一定要保存好，包括佔領運動時擋過催淚彈嘅眼罩，以及2007年參選特首時出版嘅珍藏特刊。

Emily早幾日去咗傑哥辦公室睇吓佢「執包袱」嘅進度，由於文件同物品太多，佢要問埋清潔姨姨借「垃圾車」，方便同事清理。

做議員收入少7/8 已接兩個案

傑哥告別議會後，仍然會繼續參與民主運動爭取真普選，同時會重拾資深大律師嘅工作「搵真銀」。傑哥話過去10多年擔任議員期間，屈指一算收入少咗八分之七，大律師樓嘅燈油火蠟都靠食老本維持。𠵱家告別議會，佢已經接咗兩單個案。

除咗「搵真銀」，傑哥密密游水操fit自己，但卻惹來黨內新人「嫉妒同不滿」。傑哥大笑話，有次着楊岳橋(AY)開黨內執委會，多了解黨內事務，但傑哥自己就走去游水，「AY知道我去咗游水後，話要揑死我，哈哈」。

告別議會唔代表會告別政壇，被問到會唔會接任黨主席，傑哥話一切等個黨決定，但就一啲都唔抗拒。傑哥亦提到該黨未來會有全面嘅發展計劃，包括重點發展地區工作同擴樁腳、建立人才庫，以及籌款等。傑哥話，唯有地區工作紮實先可以令個黨有堅實嘅支持，明星效應係難以持久嘅。