【明報專訊】立法會主席曾鈺成即將卸任議員，但唔代表佢會變得清閒，噚日起佢就喺商台開咪主持節目《鈺成千里目》，呢個節目逢周一至周五上晝播出，每集半個鐘，頭炮嘉賓就請嚟佢細佬、民政事務局前局長曾德成，呢個兄弟檔首集只係講吓細個去北京所見所聞，未有爆料。

話文革時北京人樸實 之後變差

曾德成話離開政府後，早前應朋友建議去咗北京小住，由2月底住到7月初先返港，兩兄弟早前喺「兩會」舉行期間亦趁機見吓面。兩人隨即話當年，話1971年佢哋全家人一齊去北京玩，兩個都係首次搭飛機，曾鈺成話當時仍處文革時期，北京人見到佢哋啲外人特別客氣。曾德成憶述當年同哥哥喺王府井買西瓜經歷，話佢哋揀好西瓜準備買，小販竟然唔「自賣自誇」，反而提佢哋個西瓜「不是好瓜」，要揀另一個，令佢覺得好似去咗《鏡花緣》中嘅「君子國」一樣，至今仍印象深刻。

曾鈺成話1980年代、六四前佢再去北京，但感覺愈嚟愈差，北京人周圍都嗌交，有次去工藝品店想買絲巾，叫售貨員拎得兩三條嚟睇吓，對方鬧佢「要不要？要就付錢，不要搗亂」，曾鈺成話當時撳唔住把火，鬧對方「國家的架畀你丟晒」，佢形容呢件事並唔係個別事件。

曾德成話，呢幾個月小住北京，平日搭地鐵多，大讚北京地鐵方便，乘客明顯走入中產，大部分人都守秩序，又話內地手機盛行，出街買嘢甚至派利市都係用手機「嘟一嘟」，利市封都慳番。