政府資助 超區1票14蚊 票王鄺俊宇唔回水畀阿涂

政府資助超區1票14蚊票王鄺俊宇唔回水畀阿涂

[2016.09.08] 發表

【明報專訊】立法會選舉嘅候選人各項開支龐大，好似「超級區議會」嘅選舉開支上限高達693.6萬元，如果用到盡，一次選舉嘅開支已經可以買層樓喇。咁大筆數，政府亦有部分資助，好似超區咁，候選人每取得1票，政府會資助14蚊，或者選舉開支嘅一半，以較低者為準。

以超過49萬票當選嘅「票王」鄺俊宇(Roy)話，今次選舉一定牽涉巨額開支，但暫時未計好實數，但阿Roy笑言攞幾多票都唔會「發達」，因為補助有上限。咁阿Roy吸走咁多票，又會唔會分番部分資助額畀最終險勝嘅黨友涂謹申呢？阿Roy話，法例應該係唔容許佢咁做嘅。

阿涂：講錢傷感情

阿涂喺選舉日對分票不均好憂慮，後期更將facebook頭像轉為黑色，又發火批評配票失當等，有政界口痕友就質疑，阿涂唔通係在意每票14蚊，所以咁擔心被扯走選票？阿涂話，佢嘅選舉工程用咗大約560萬元，按政府條數，即係最多只能拎到280萬元資助，取得20萬票已經拎到上限資助，直言呢個說法無稽。咁阿涂會唔會要求阿Roy計番選票錢畀佢呢？阿涂對呢個說法一笑置之，話講錢就傷感情啦。

另外，棄選嘅公民黨陳琬琛、新民主同盟關永業早前都要自掏腰包負責選舉開支，後者更透露考慮按咗層樓搞選舉工程，相信呢筆選舉債都幾重，公民黨日前就為陳琬琛眾籌，希望大家唔好淨係讚佢棄選，叫大家都可以捐款幫吓手，以應付其選舉開支。

更多港聞