唐唐心水特首條件﹕ 要識「家和萬事興」
[2016.08.18] 發表
【明報專訊】政界都關注特首選舉跑馬仔消息，全國政協常委唐英年無表態支持邊個做下屆特首，只係話欣賞同支持有能力嘅人表態參選。財政司長曾俊華早前表明願意參選，梁振英同政務司長林鄭月娥亦被指可能落場，但唐唐認為，如果兩個司長加埋特首同場競選，就會出現政府內部互指不是嘅情况，令人感覺「好怪」。
如果應該只有一個司長選，咁林鄭定財爺出好啲呀？唐英年無正面回應，笑言「呢個問題我點答你呀？」
4年前落選特首嘅唐唐，噚日出席民建聯活動時就透露對下屆特首嘅期望，話除咗愛國愛港，亦要有能力團結社會、促進和諧，做到「家和萬事興」。咁梁振英符唔符合以上條件呢？佢回應傳媒提問時，就形容梁振英政通人和做得不足，可以做得更好。
更多港聞
相關新聞
