奧運熱殺到 齊打體育牌 財爺回味京奧 CY談體育園

財政司長曾俊華（右）噚日出席「傑出小戰士選舉頒獎典禮」，得獎者都係兒時曾患重病、其後有卓越成就嘅人，財爺讚揚佢哋勇敢應對人生挑戰。（馮凱鍵攝）

特首梁振英（右）噚日喺調景嶺出席「全民運動日」，落場玩滾球，佢之後喺facebook發文，祝香港運動員喺里約奧運「滿載而歸」。左為體育專員楊德強。（蘇智鑫攝）

【明報專訊】梁振英﹕推動體育普及化

巴西里約奧運開幕，香港有38名運動員出戰，特首梁振英(CY)同財政司長曾俊華噚日就分別為一眾健兒打氣，CY喺調景嶺出席「全民運動日」後，喺facebook祝運動員發揮最佳水準、滿載而歸；而財爺就發表題為「全力爭勝」嘅網誌，為香港運動員打氣，但有網民就留言話，「你都要全力爭勝」。

兩名疑似下屆特首參選人同樣不忘抽水，講吓自己喺體育方面嘅政績。CY就推銷啟德體育園，話今屆政府已經決定斥資興建，以推動體育運動普及化，形容體育園係香港有史以來最大型嘅體育設施。CY趁噚日全民運動日，話走入社區，去咗調景嶺體育館探望正參與全民運動日嘅市民。

曾俊華重提設70億運動員基金

另一邊廂，財爺話自己喺幾年前嘅財政預算案，宣布成立70億元嘅「精英運動員發展基金」，而基金成立以嚟，香港全職運動員人數已經上升六成，近年喺國際賽事嘅成績亦不斷進步。

財爺又形容奧運對自己呢類體育迷係四年一度嘅「頭等大事」，話奧運帶畀佢唔少美好回憶，當中以2008年北京奧運最難忘。佢憶述當年同太太去北京睇比賽，為中國隊同香港隊運動員打氣，又同來自各地嘅觀眾一齊盡情吶喊，「心情確實激動」咁話。

更多港聞

張國鈞表演5下引體上升 姚松炎踩車爭單車徑

【明報專訊】里約奧運開鑼，唔少立法會選舉候選人都借住呢股體育熱潮幫自己宣傳。出戰港島嘅民建聯張國鈞（Horace），噚日同參選超級區議會嘅黨... 詳情

家有「實驗兔」 黃友嘉﹕佢識安慰人

【明報專訊】強積金管理局主席黃友嘉（右三）噚日出席寵物活動，佢同Emily透露屋企養咗隻白兔仔叫「Pillow」，當正兔仔係家人。黃友嘉話「... 詳情