【明報專訊】由影星、美國加州前州長阿諾舒華辛力加發起嘅「阿諾國際體育節」本月19至21日首度喺香港舉行，大會噚日邀請咗兩個嚟自英國嘅大力士，拉郁8.7噸嘅大貨車為活動熱身，其中一個仲係女大力士𠻹。Emily喺現場仲見到阿諾出出入入，皆因現場有大會工作人員不停舉住阿諾嘅人型紙牌博上鏡，場面都幾搞笑。

男大力士Gary將繩索綁喺貨車頭，自己揹起繩索，手拉住綁喺另一輛貨車嘅粗麻繩，一鼓作氣拉動8.7噸重嘅大貨車，仲拉咗成10米咁遠。Gary話起步係最困難，「一拉郁咗架貨車，之後就靠貨車嘅動力向前移，就唔使出咁多力」。

首度登陸香港 19至21日舉行

女士亦都不甘示弱，女大力士Santina同樣都拉到10米距離，佢拉完之後覺得前臂有啲刺痛，不過仍然為挑戰成功感到好開心。