奧運開場諗定閉幕 劉江華邀國家隊金牌選手訪港
【明報專訊】備受矚目嘅4年一度嘅國際體育盛事奧運會,今日喺巴西里約熱內盧正式揭幕。民政事務局長劉江華就飛咗去當地探班,為香港運動健兒打氣,亦會出席開幕典禮。劉江華透露,準備緊喺奧運會之後邀請國家隊金牌運動員訪港。佢又勉勵香港運動員喺比賽全力以赴,相信一定可以發揮水準,表現優秀。
港隊今屆派出38名代表出戰9項運動賽事,包括劍擊、乒乓、游泳、羽毛球隊。劉江華噚日到埗後,已經馬不停蹄同備戰緊嘅運動員交流。佢先到划艇賽場地,了解香港選手最後備戰情况,又出席咗奧運選手村為香港代表團舉行嘅歡迎儀式同埋升旗禮,同運動員共進午餐。
同港隊進餐 撞到奧朗德探班
不過,今屆巴西奧運會未開始,已經有唔少負面新聞傳出,包括運動員被搶劫,奧運村設施又問題多多。不過Emily就聽聞,局長到埗都好好彩,膳食出事、打劫都統統無遇上,行程安排都好順利,因為當地安排專人服侍各參賽地區嘅官員代表。佢哋午餐嗰陣,仲咁啱撞到法國總統經過探班𠻹。