【明報專訊】立法會連續3個禮拜流會後，噚日恢復審議預算案《撥款條例草案》，不過晨早流流未開會就火藥味十足。帶同「金鉸剪」及「拉布徹底破產」橫批嘅工聯會王國興(左)進入議事廳時，遇上拉布議員社民連梁國雄(長毛，右)。兩人好似火星撞地球咁，一度發生指罵推撞。王國興斥責長毛係「假哲古華拉」，霸住公屋，長毛就唔客氣拍打咗王國興手上嘅道具幾下。

不過對於邊個郁手先，兩人就各執一詞。王國興指摘長毛郁手郁腳，強烈譴責對方粗暴行為，仲話長毛打到佢心口，仲有聲𠻹。不過佢自稱「學過武功」，所以無受傷，「我都卸咗佢道力啦」。既然「遇襲」，咁係咪需要報警？王國興就話「公道自在人心」，譴責完已經夠喇喎。不過，長毛就反指對方含血噴人，話王國興先觸碰到佢，於是順勢推開對方，「就係咁簡單，佢講乜都得啦」。

(有線新聞畫面)