吳秋北好揪得 擬選港島 排第二幫郭偉強抬轎

吳秋北好揪得擬選港島排第二幫郭偉強抬轎

[2016.04.20] 發表

【明報專訊】曾積極參與反佔中的工聯會理事長吳秋北，喺政界有一定知名度，據知工聯會有意推佢出嚟9月選立法會，但主要目的係幫現任議員郭偉強一把，因為郭偉強如果出選港島，未必夠實力贏到，所以諗住搵秋北幫手，排喺名單後面幫郭偉強「抬轎」。

打理工會事務暫不入立會

講到選舉，秋北其實都算係素人，但作為工會理事長，近年因為反佔中、標準工時等議題人氣大升，反而勞工界議員郭偉強知名度一般，如果郭轉戰港島直選，秋北列陣隊尾有一定幫助。有工聯會成員就話，秋北係福建人，同以港島做根基嘅福建社團關係好好，而呢啲社團早前更向工聯會提出，由秋北打頭陣出選港島仲好。不過，工聯會內部就認為，秋北可以經歷多啲磨練先去做立法會議員，况且工聯會都要有人去做大內總管打理工會，所以工聯會內部有默契，理事長唔會選立法會。

對於係咪參選，雖然秋北好謙咁話自己唔夠能耐，但就繼續扮演好打得角色，繼早前拍短片以詠春師父造型講述打工仔工時太長，搞到想去學功夫強身健體都唔得，工聯會近期更推出海報宣傳，秋北繼續葉問上身，呼籲支持者5月1日上午10時去灣仔修頓球場，參加五一大遊行，爭取取消強積金對冲、統一公眾法定假及標準工時等。

更多港聞