【明報專訊】近年潮流興跑步，相關賽事亦愈搞愈多，仲唔只係運動賽事咁簡單。Emily噚日朝早去咗九龍東睇「全城街馬」主辦嘅「AXA安盛香港街馬@九龍東2016」，由啟德郵輪碼頭出發，途經觀塘海濱長廊、觀塘工業區及九龍灣住宅區，吸引近萬人參與半馬拉松與10公里賽事。

賽事納入咗政府嘅「欣賞香港」項目，政務司長林鄭月娥同教育局長吳克儉一齊捧場主持鳴槍儀式。噚日朝早風雲變色，林鄭致辭時話希望跑手發揮「正能量」阻擋天雨，但最終因為天文台發出黃色暴雨警告信號，大會要腰斬半馬賽事。

小丸子泰山出動

賽事腰斬咗係可惜啲，但Emily「欣賞」跑手打扮都好開心，除咗有少女穿水手裝，有人扮小丸子，亦有「貞子」出沒；有人戴帽扮差利卓別靈，有人就著露肩泰山野人裝，簡直目不暇給。