【明報專訊】前全國人大代表吳康民90歲大壽，噚日擺壽宴兼慶祝出新書《90歲月留痕——吳康民回憶錄》，不少傳統左派都有到場祝賀。特首梁振英同中聯辦主任張曉明喺致辭時齊笠高帽並祝壽，CY話吳老書名話「留痕」太謙虛，希望佢多多立言立功、筆耕不輟。張曉明就連用四字成語，讚賞吳康民嘅政論文章絕不「無病呻吟」、「矯揉做作」，而係「激濁揚清」、「入木三分」。佢仲話吳老嘅情懷同風骨，喺眼下香港尤為可貴。 張曉明提到，有一次睇到吳老嘅文章，忍唔住即刻打電話畀吳老，為佢叫好。雖然吳老經常發表文章，但舊年8月撰文批評CY換局長處理手法就受人矚目，當時CY睇完都即時喺冰島致電解釋。吳老其後亦有撰文，話「梁振英是連任特首的理想人選」，唔知令張曉明咁欣賞嘅，係咪兩篇中嘅其中一篇？Emily就問吳老，佢就話自己年紀大「唔記得啦」。 CY梁錦松前後腳到賀 噚日CY未到場時，Emily就見到前財政司長梁錦松出席片刻就匆匆離開，即係同CY「前後腳」出現，唔知點解呢？
|
| |
| |
