劉鳴煒請食飯 楊雪盈無送檸檬

劉鳴煒請食飯楊雪盈無送檸檬

[2016.03.07] 發表

【明報專訊】去年底區議會選舉後，副政制及內地事務局長陳岳鵬約新任靚女區議員楊雪盈「飲杯嘢」認識吓，點知食檸檬。事隔幾個月，有男神之稱嘅青年事務委員會主席劉鳴煒約楊雪盈及一班年輕議員食飯，楊雪盈就樂意奉陪，成班後生仔女交流政府施政應如何多啲吸納年輕人意見。與會者事後講笑，可能今次鳴煒嘅package比較優勝，所以咁多年輕議員賞面參加。

呢餐飯局喺2月26日舉行，由民政局長劉江華幫手安排，劉江華、政助徐英偉都有出席。今次嘅目標主要係80後、35歲以下嘅區議員。出席者跨黨派，有民主黨南區孖寶羅健熙、區諾軒，新民黨陳家珮、公民黨鄭達鴻及東區區議員趙家賢等。由於人多，當日要開兩圍枱，氣氛融洽。

趙家賢支持男神「落地」多啲

本身做調解員工作嘅趙家賢就話，鳴煒坐低時就講明今次係為食飯而食飯，純粹想交流吓，無其他意圖。趙家賢就提議鳴煒可以私下見吓傘後組織以至本土派年輕人，等佢可以了解一下旺角暴力衝突事件嘅原因。鳴煒亦話好鍾意同後生仔傾偈，叫趙家賢幫手約見面。趙家賢認為，鳴煒好後生就做咗上市公司主席，睇問題會從宏觀及管理角度去分析；但時下年輕人睇問題，觀點角度會好唔同，所以支持鳴煒「落地」了解多啲。