持85%正義聯盟公司股權 偲嫣稱正還債 仲係黨主席

[2016.03.04] 發表
噚日大約20人陪同李偲嫣一齊開記者會,會上有人高舉「永遠支持李偲嫣」嘅標語,會後佢哋仲齊齊手拖手,高叫「支持李偲嫣、還佢清白」嘅口號。(李紹昌攝)

【明報專訊】立法會選舉9月就到,早前表明考慮派人參選嘅「正義聯盟黨」,最近出現內亂,聲稱係該黨副主席嘅蔡克健同岑浩賓,前日開記者會指控黨主席李偲嫣虧空公款同欠債不還,偲嫣噚日就開記者會大反擊,強調無欠20個人共90萬,只係欠5人共約70萬,大都已還清,目前只差約23萬債務未搞掂,聲稱喺今年中能還清。

稱23萬債務未搞掂 今年還清

雖然蔡克健同岑浩賓早前就話要開除偲嫣黨主席同黨籍,偲嫣噚日強調,「正義聯盟有限公司」一直喺佢名下,持有85%股權,佢先係大股東,蔡只有5%股權,強調開除黨籍要會員大會通過,唔係求其搵幾個簽名就搞掂,堅持依然係「正義聯盟黨」黨主席。

虧空公款指控 李:係誣告

對於蔡克健話偲嫣虧空公款,亦報咗警,警方將案暫列「聲稱盜竊」調查,偲嫣話上述指控係「浪費警力、誣告」,當記者問到偲嫣會否一如既往支持警方執法,佢即刻話「梗係啦」,仲話會主動向警方提供資料,要求嚴正執法。

偲嫣尋日喺酒樓宴會房搞嘅記者會,逐點反擊講咗成兩個鐘,其間門外就嚟咗一班「事主」踩場,聲稱追數,偲嫣就聲稱要報警;而偲嫣支持者就真報警,要警察到場,今次真係辛苦阿sir啦。

更多港聞
羊子又想選新東  或與國師搶客
【明報專訊】一向衣著另類、曾參選去年區議會選舉而敗選嘅中出羊子(圖),噚日就喺網媒《輔仁媒體》發表文章,話有意9月參選立法會選舉,仲列埋競選... 詳情
【明報專訊】新民主同盟范國威(Gary)日前宣布有意競逐立法會超級區議會議席,但Gary喺2010年因為反對新增超區議席嘅政改方案,退出民主... 詳情
梁天琦不排除立選狙擊白鴿黨  林卓廷fb挑機:包唔包擲磚?
【明報專訊】本土民主前線梁天琦近期人氣都幾高,而本土派同民主黨一向道不同,前者聲稱自己係「勇武」,而後者堅持「和理非」,而民主黨總幹事林卓廷... 詳情
創科局政助利申  港美有物業
【明報專訊】政府今年1月公布,委任鍾偉強及梁淑寶分別出任創科局副局長及政治助理,兩人已經返緊工,其中洋名Sandra嘅梁淑寶(圖),利益申報... 詳情
Ann姐犯禁  公眾席影相
【明報專訊】自從立法會就版權條例拉布後,立法會議員蔣麗芸(Ann姐)經常喺會議廳影相並放上網,以證明會議期間少有泛民議員在席,而佢可能影上癮... 詳情

明報網站 · 版權所有 · 不得轉載
Copyright © 2016 mingpaocanada.com All rights reserved.
Ming Pao Daily News A wholly owned subsidiary of Ming Pao Enterprise Corporation Ltd.
Vancouver Chinese Newspaper

5368 Parkwood Place, Richmond B.C. V6V 2N1 | Tel.: (604) 231-8998 | Fax: (604) 231-9881/9884 | Advertising Hotline Tel.: (604) 231-8992