【明報專訊】旺角發生衝突事件，參與及被捕嘅唔少係年輕人，而青年事務委員會主席劉鳴煒當時雖然喺外地，但都好關心呢件事。佢同Emily傾閒偈講起，唔係好明後生仔點解要用暴力，但就認為起因唔係青年人對就業同教育不滿。不過，佢認為外地處理「騷亂」事件，用強力打壓方式對付，唔係最好方法。對於中央官方形容今次涉及「分離組織」，佢就話唔係太清楚，但睇嚟今次係因「魚蛋」引起，而呢個議題都幾「本土」，所以認為最多只係一小部分本土人士所為。

指起因非不滿就業教育

智庫「智經研究中心」噚晚搞傳媒團拜，副主席「男神」劉鳴煒就大談智經大計，佢話今年要擴充營業，話員工數目𠵱家有25人，但可以加到35。不過佢話請人都幾煩，雖然最近收到近150份應徵信，但根據過去經驗，有近一成應徵者可以篩走，話經常收到一啲電郵話想應徵「青年協會」，亦有人寫住應徵「政府」職位。換言之，求職者連求職機構嘅名都搞錯。

劉鳴煒又話，以前智經請人，預約應徵者面試，結果一半人甩低，所以𠵱家佢哋用一個方法，喺面試前會要求應徵者簡單寫100字嘅文章畀佢哋，目的只係想試下對方嘅誠意，用咗呢個方法後，面試應約比率升到七成。