建制赤口落區拜年 財神盧偉國色士風吹賀年歌

建制赤口落區拜年財神盧偉國色士風吹賀年歌

[2016.02.11] 發表

【明報專訊】噚日大年初三，唔少建制政黨都毋懼「赤口」，四處向市民拜年。民建聯兵分多路，譚耀宗同梁志祥就喺屯門送香囊，主席李慧琼(Starry)就同黨友蔣麗芸到美孚同石硤尾邨同街坊握手。Starry話，街上遇到嘅都係熟口熟面嘅朋友，感到熱鬧同親切，似乎無人要撩交嗌。

民記兵分多路工聯花車巡迴

經民聯副主席盧偉國就化身「財神」，同立法會議員梁美芬喺紅磡大派朱古力金幣同利市，祝願街坊甜甜蜜蜜。「財神」盧偉國仲即席表演拿手樂器，用色士風演奏《財神到》及《歡樂年年》嘅喜慶歌曲。佢話特意帶來「金銀膶」嘅色士風演奏，希望市民「家肥屋潤、金銀滿屋」。可惜經民聯身形最有福氣嘅「肥老闆」張華峰，今年無再扮「財神」出現啦。

工聯會就秉承傳統，舉辦新春花車巡遊活動，由立法會議員陳婉嫻同黃國健帶頭，巡迴黃大仙及觀塘，向市民送上祝福。政府24號將公布新一份財政預算案，工聯會就不忘追數，希望預算案可以惠及基層市民同打工仔。