【明報專訊】噚日中國互聯網發展基金會公布，全國政協常委、周大福企業主席、新世界主席鄭家純(圖)向呢個基金會嘅網絡安全專項基金，捐贈3億人民幣，主要用於獎勵網絡安全優秀人才、資助網絡安全專業優秀學生嘅學習和生活、支持網絡安全人才培養基地等工作。Emily睇番個基金會官方網頁，純官好畀面，又出錢，又現身，仲致辭話「沒有網絡安全就沒有國家安全」，佢話保障網絡安全當舉國家之力，也當舉全民之力。

「沒有網絡安全就沒有國家安全」呢句話好hit，其實除咗純官，噚日有份致辭嘅嘉賓，好似中央網信辦副主任、國家網信辦副主任王秀軍，同埋中國互聯網發展基金會理事長馬利都有提到呢一句話。 中國互聯網發展基金會來頭不小，佢係經國務院批准，民政部登記註冊，由國家互聯網信息辦公室主管，係具有獨立法人地位嘅全國公募基金會。