獲續約兩年善美影室翻生

[2016.01.30] 發表

【明報專訊】傳統菲林影樓善美影室之前因為業主唔肯續租，原本要喺下個月初搬走，老闆林國盛及阿仔好努力咁搵新舖，亦多次同業主傾下有冇得通融，繼續原址營業。幾經周旋之下，阿仔噚日同業主達成協議，用月租2萬多元續約兩年。林老闆笑住話結業消息一出，好多舊客都「趕尾班車」，每日都好多人上門影相，𠵱家仲有兩年時間，「大家可以稍事休息」。

林國盛話，要搵到合適店舖唔容易，因面積較大嘅單位好多都做咗劏房或者足浴店，根本沒啱嘅單位用，今次好彩「唔使再煩搬嘢，郁咗去第二度就唔識影相，𠵱家客人上慣嚟，我又做慣」。佢話，客人上影樓拍照就好似返屋企，如果搬去第二個地方，就冇咗呢種感覺，佢講笑咁話，「搬咗之後，可能要曬相師傅表演打筋斗才能吸引客人」。