【明報專訊】零垃圾桶不是夢？fb專頁「結束一桶專棄」率先透過三日兩夜嘅音樂營活動，示範「零垃圾桶」試驗計劃，提醒參加者「自己垃圾自己帶走」，仲回收咗超過100公斤垃圾𠻹。

當眼處設回收站清洗站

呢個草民音樂營喺元旦日開始，特別之處係營地裏面冇擺放任何垃圾桶。「結束一桶專棄」團隊將兩個回收站攞喺場地最當眼處，另外有清洗站，畀參加者先將回收物簡單清洗再放入回收桶，保持回收物乾淨。

專頁發起人Celia同Emily講，發現透過分類回收，經過統計今次嘅活動已減少咗大約4至5架大垃圾車嘅垃圾棄置量。而今次活動中回收咗超過100公斤、約20大袋嘅回收物，團隊都好滿意。但係回收活動都唔係完全順利，Celia見過有人嫌分類回收麻煩，喺回收站前丟低一句「黐線」就拂袖而去，但Celia話唔介意，因為呢啲只係小眾，大部分參加者都好乖咁主動將垃圾拎到攤位分類。

佢哋仲量度咗由參加者自己拎走嘅垃圾重量，發現人均垃圾量最多只係0.6公斤，少過2014年每個港人每日平均棄置1.35公斤嘅都市固體廢物一半有多。Celia強調回收分類唔係「可做可唔做」嘅活動，希望其他活動主辦者願意仿效、畀資源搞垃圾回收。