【明報專訊】後日就係元旦，今屆新當選嘅區議員先會正式上任；不過民建聯有兩名沙田區候任議員就似乎好「猴擒」，提前自稱「沙田區議員」，幾日前喺街度掛起宣傳品。成功連任嘅沙田區議員麥潤培就不滿對方偷步，喺facebook質問「上任左啦咩？」，網民就留言「幾日都唔等得？」 。
Emily問過橫額上出現嘅碧湖區候任議員黃冰芬，但佢聽到呢個消息都表示大吃一驚，話自己從來無掛過，講到明區內任何宣傳品都未整。
黃冰芬話同事唔為意 已拆走
黃冰芬同同事了解之後向Emily解釋，話係有同事無為意，可能趕住放假掛咗banner先。黃冰芬都承認咁樣掛有問題，噚晚立即行動「執手尾」，又講笑話「咁勤力嘅同事真係唔知要讚定鬧」。
