【明報專訊】香港青少年軍年初成立，爭議不斷，被指係「洗腦團體」，有報道話成立典禮上好多觀禮嘅青少年都係「被觀禮」。不過，當然都有真心加入嘅朋友啦，培僑中學為咗配合出年嘅學生軍事體驗營，今個月搞咗個「團員先修班」，30幾名中學生參與軍體拳同步操等基本訓練，仲請到前一哥、香港青少年軍總會諮議會成員鄧竟成到場打氣，見佢睇完學生訓練，同學生有講有笑，都好投入。

參與制服團體助自強自律

鄧竟成同學生分享，話青少年參與制服團隊係鍛煉自強、自律同自信嘅好機會，但不需要太介懷能唔能夠達到訓練嘅最高要求，最緊要係善用時間，爭取自己想達到嘅目標；以正確態度處事都好重要。佢補充，每一個制服團體都有突出之處，希望社會各界逐漸了解青少年軍。