局長﹕我100% 林﹕49.52% 克儉大輝爭拗出席率
[2015.11.11] 發表
【明報專訊】教育局長吳克儉(左圖)前日出席立法會教育事務委員會，聽完第一項議程就因公務而早走，仲話自己去年喺立法會教育事務委員嘅出席率係「百分之一百」。不過，教育事務委員會主席林大輝(右圖)噚日反駁吳局長，話「百 分之一百」嘅說法有偏頗，叫吳局長唔好用語言藝術誤導傳媒同公眾。大輝仲拎埋數據，話統計過吳局長過去3個年度嘅「實際出席情况」，話雖然佢有去到委員會，但無坐足全程，如果用討論議案數目去計算局長嘅出席率，實際平均只有49.52%。
林大輝統計教育事務會數據
對於大輝嘅指控，吳局長似乎唔順氣。佢透過新聞秘書話，局長當日回答有關佢喺教育事務委員會出席率問題時表示「百分之百有出席有關會議」，係根據一項有關2014至15年度出席會議次數嘅統計，而以會議「次數」計，佢確係次次都有到，話事實勝於雄辯。教育局又話，局長同官員有分工，有時局長聽完一啲議程，就會交畀副局長或其他官員，就另一啲議題為議員解答。教育局反駁大輝，話如果將出席「次數」嘅出席率「被誤解，甚或扭曲」，局長對此表示無奈。
吳克儉：以次數計 次次有到
誰是誰非，讀者自行判斷喇。不過，大輝同局長近日都有唔少火花，包括批評吳局長唔出席月底舉行嘅TSA公聽會。大輝噚日公布吳局長出席聆聽議案比率之餘，仲話教育界正值多事之秋，喺呢個重要時刻，懇請吳局長勤政愛民，仲語氣好重咁提醒吳局長「切勿怠懶、卸責而影響香港教育健康發展，拖累特區政府有效施政」。
更多港聞
【明報專訊】現代女性要兼顧工作同家庭，好容易忽略自己甚至性生活。有性用品品牌就委託國際機構，調查香港女性對性生活嘅滿意度，喺上月13至22日...
詳情
【明報專訊】立法會財委會主席陳健波前日喺電台節目談及立法會「拉布」時，突然話香港選舉制度畸形，「（候選人）可能2萬票3萬票已經（當選）」，故...
詳情
相關新聞
