【明報專訊】社署前署長余志穩(Stephen Fisher，圖)早前剛將樂施會總裁一職交棒畀梁詠雩，Emily噚日就收到融樂會宣布，Fisher正式獲選為融樂會新任主席。Fisher其實一直好關注少數族裔議題，佢2009年退任社署署長後已經有意幫弱勢社群，之後喺2011至12年做過融樂會副主席，多次向政府力爭少數族裔權益。

一退任就立即返融樂會，Emily聽講，Fisher加入樂施會前本來都想留喺融樂會接任主席，但最後決定去樂施會幫手，佢在任期間已講明只做一屆，於是今年9月退任樂施會總裁後就「回巢」。有心為少數族裔爭平權嘅Fisher以往多次明言，會「掉轉槍頭」同官員「講數」，Emily希望Fisher繼續據理力爭，消除在港少數族裔嘅生活同教育障礙。