【明報專訊】今屆區議會選舉，唔少選區有新面孔出現，好似南區現任區議會主席朱慶虹，就被專門研究房屋、土地問題嘅學者姚松炎挑戰。朱慶虹嘆道，傳媒可能對第一次參選嘅人有多啲興趣，但16年前嘅佢一樣要犧牲自己事業去參選，「唔係第一次選就大晒！」

南區置富選區今年兩個候選人都有高學歷，首次參選嘅姚松炎係中大地理與資源管理學系副教授，提倡由下而上嘅地區管理，而朱慶虹亦有博士學位。朱就話做咗區會主席後，為南區區議會引入「工作目標」要求，畀居民全面監察區議會做緊乜，以及畀意見，「係18區唯一一區有咁做」。

對手以學者形象出選，朱慶虹話自己有博士學位，最自豪係喺英國倫敦音樂學院取得鋼琴院士文憑，參政前出過3張鋼琴唱片，寫過10多本音樂相關嘅書。2000年佢贏咗區選後，翌年成立咗香港南區管弦樂團，一開始水準一般，佢唯有自己改編啲簡單樂曲畀樂團演奏，經過多年培訓，話樂團𠵱家已好專業，贏過唔少獎。