車路士Vs利物浦
羅馬不是一日建成，所以利物浦新帥高普不斷叫大家給他時間；然而羅馬又可否一日之間推倒？紅軍今天的對手車路士由上屆英超近乎無敵到今季極速沉淪，比起莫耶斯教曼聯還要衰得多，不過矛頭則同樣指向主帥。柏高說過車仔死因之一源於收league後先掘金再放假，現在加多一筆，就是摩連奴聲稱的「反車運動」。
摩佬今年做了許多爭議事情和講了許多爭議說話，但有爭議不一定代表有錯。例如跟女軍醫Eva的紛爭，柏高曾指Eva乃摩佬不滿整個車路士醫療部門工作效率的代罪羔羊，然後事件因着當下的傳媒和社會生態愈搞愈大，昨天又證實Eva向車仔發律師信索取解僱賠償，基本上已遠離摩佬責任範圍，難言對球隊劣績或軍心有何實質影響。至於最近摩佬全面向傳媒開火，固然無助車路士反底，惟也不見得會帶來進一步打擊，何况摩佬向來風格如此，再說費格遜亦長年杯葛BBC又如何。
以全世界為敵並非什麼大問題，不過嘢可以亂食，有啲說話真係唔可以亂講，尤其是在方丈好小器的環境。摩佬去年杪無情白事抨擊輿論連同球證攜手採取針對車路士的反車運動，柏高當時感覺是不僅毫無理據，甚至有點惡人先告狀。此話何解？例子之一是泰利，有認真睇佢踢波就會發覺，他攔截射門時習慣像門將封位那樣大字形雙臂張開，但就算射中手臂，球證一律視若無睹，對手欲獲罰球或12碼乃奢想。投訴必須有理，否則基於鐘擺原理，徒然惹來更大反感，唔衰攞嚟衰。
泰利長期波打手免罰
上季球證受到反車運動論挑釁隱忍不發，但摩佬今屆再來一個7分鐘自白，又是毫無理據地批評球證冇膽判極刑(事實是大抵忠實車迷也非人人覺得該判罰)，那就真是佛都有火，唯有畀啲guts你睇，上仗不尋常地令尼曼查馬迪兩黃一紅。不尋常的尚有韋斯咸的首個入球，車仔防守死球組織散亂固然難得一見，更奇怪是泰利封阻莫路沙拉迪叩關時，竟企到直並收埋雙手在身後，此舉要不是泰利臨老轉死性改踢法，要不是他深知球證已被激嬲，英軍(前)隊長都冇面畀。
冤有頭債有主，柏高不止一次提出如今英超球會愈來愈少實行傳統領隊制(熱刺索性把普捷天奴官方title叫做主教練head coach)，因此若將車路士今夏轉會市場的失誤怪在摩佬頭上，乃徹底搞錯對象；季後掘金行他或有決定權，但恐一旦推翻高層盤算將得罪太多人，只好延遲開操以遷就，卻想不到讓球員狀態追上進度重回正軌如此艱難。摩佬貶夏薩特為後備的做法也許可以圓滑些，然而一家唔知一家事，球迷不該太相信英媒吹風。事實是夏神也非全面遭雪藏，從場上表現亦暫時看不到球員拒替摩佬賣命之意。
可督師藍紅戰
今天坐鎮史丹福橋大戰利物浦，據報摩佬依然可在後備席督師，起碼足總沒有趁機報復，違反程序公義提早處理摩佬上仗被逐。摩佬是時候放下仇恨，少說話多做事。紅軍新帥高普的笑面虎形象會否是個合適的學習對象？
