【明報專訊】「法律超人」嘅造型曾經被律師會嚴厲批評,但其實律師未必咁嚴肅嘅,好似律師會最新一期會訊《香港律師》,就刊出律師會一個好破格嘅廣告,宣傳佢哋下月開派對。廣告中有個左邊心口印咗啤啤熊公仔紋身嘅「露點」男模,旁邊有4個著舞衣嘅艷女扭動身體,唔知佢哋想開咩P呢?活動dress code係「not anything you would wear to office」。有律師喺fb留言講笑話見到呢個廣告想嘔,最攞命嘅係,男模右臂有水印,寫住「Trust me I'm a Solicitor」。
本身喺律師嘅法政匯思任建峰就喺fb話,「不少我認識的年輕律師(有些更是與我政見不同的)都覺得這單張『見到都已經唔開胃』……有些更說見到後不想認自己是律師。」佢又講笑話自己雖然老餅,但至少喺品味上大概知道年輕律師唔想要啲咩。公民黨律師黃鶴鳴亦留言講反話,「亮點在手臂上的紋身,型到呢」。
睇番廣告,應該係叫做法律繽紛嘉年華舞會,11月14日晚上喺將軍澳某酒店舉行,收費唔平,會員600元,非會員750元。