【明報專訊】政府嘅「創意香港」辦公室資助本港出版印刷業界470萬元衝出香港，將本港的書籍、印刷品帶去外國書展，頭炮係喺本月14至18日嘅德國「法蘭克福書展」設香港館。為吸引外國人，籌委會邀請本港5間印刷公司，製作多本以香港為主題嘅立體書，包括九龍城寨、「雷生春」等香港特色建築，仲會喺會場即席整香港特色小食雞蛋仔畀老外品嘗。

香港出版總會、香港印刷業商會合辦「騰飛創意——香港館2015-16」，第一站係「法蘭克福書展」香港館，將會有53間香港參展商，展出超過1000項本港圖書、印刷品及電子書。香港印刷業商會副會長梁兆賢話，部分較大型嘅書商會自己去參展，但中小企就比較難做到，希望可以透過香港館協助佢哋。

另外，明年2月16至21日就會去「台北國際書展」，4月4日至7日會移師去意大利「博洛尼亞兒童書展」。