【明報專訊】內地媒體早前發文話富商李嘉誠撤資，搞到誠哥都發聲明，反駁官媒「文理扭曲」、「令人不寒而慄」。前政協劉夢熊噚日就喺報章賣全版廣告，話要撐誠哥，話「對李嘉誠的輿論圍剿應馬上剎止」。劉喺廣告中提到內地官媒對李嘉誠的「討伐」，係違背咗「改革開放總設計師鄧小平的教誨」，「錯批李嘉誠，嚇怕投資者」。 劉夢熊又話，內地為咗「模糊人民視線」，「轉移社會矛盾」，「企圖掩飾經濟走勢下滑」，「營商環境惡化背後的政治原因」，就賴到李嘉誠身上，將佢當做「替罪羊」。劉夢熊又引用鄧小平嘅講話「不搞爭論是我的一個發明」，指內媒違背鄧小平教誨。 香港潮屬社團總會今日亦喺報章賣廣告，話誠哥對於「所謂撤資的說法，在他的公開聲明中，已作清楚的解釋，有關的指控完全不成立」。總會又話，習近平主席都話要搞「一帶一路」，鼓勵企業外出搵投資機會，誠哥投資海外，「與國家政策並無抵觸，個別人士的批評顯然是無的放矢」。
|
| |
| |
