【明報專訊】中共中央政治局委員、統戰部長孫春蘭噚晚到咗香港，展開一連三日訪港之旅。通常中央官員訪港，都會趁機會見吓其他人，Emily聽聞，搞統戰嘅孫春蘭唔會同民主派見面，不過就約咗近日被內地官媒鬧得好勁嘅長和系主席李嘉誠，今朝一齊食早餐，唔知係咪中央叫孫春蘭嚟親自「呵」番誠哥呢？長和系公關噚日就未有回覆Emily查詢。 孫春蘭向老兵頒發紀念章 孫春蘭訪港住喺灣仔海皮嘅君悅酒店，佢嚟香港其實主要係出席「香港各界紀念抗日戰爭勝利暨台灣光復七十周年大會」，特首梁振英、中聯辦主任張曉明等都會到場，重頭戲係會向10個上月無上到北京閱兵儀式嘅居港抗戰老戰士頒發紀念章。另外，佢今日下晝就會去禮賓府同梁振英食午飯。 Emily聽聞，孫春蘭此行仲會同社團領袖、友好協進會代表、政協聯會等聚會，相信唔少政協常委等重量級人馬都會出席，而除咗李嘉誠，孫春蘭會唔會同其他大孖沙見面呢，Emily就不得而知喇。另外，佢又會見青年代表，至於建制政黨，Emily聽聞今次無特別安排，不過相信部分政黨代表都有其他身分，或者都有機會同孫部長聚一聚。 今次孫部長訪港，係舊年佔領運動後，首次有有份處理香港事務嘅中央官員訪港，唔知此行仲有無乜嘢重要信息帶畀港人呢？
|
| |
| |
;){kind=small}
