任建峰發起 促勿人身攻擊 「問候盧寵茂」熱傳

任建峰發起促勿人身攻擊「問候盧寵茂」熱傳

[2015.10.01] 發表

【明報專訊】香港大學校委、港大學生會會長馮敬恩前日大爆8名校委否決陳文敏出任港大副校長嘅原因，其中校委盧寵茂指陳文敏未有喺佢7月校委會會議跌倒後慰問佢。「法政匯思」召集人任建峰喺facebook發起「#我問候盧寵茂行動」，認為盧教授可能喺日常生活上缺乏愛，希望大家一齊問候吓盧教授，讓他感到世間有愛。呢個行動令到facebook一夜間遍地花生。

網民熱烈響應，有人問候盧教授「陰公豬上次有冇跌壞腦？」；亦有人覺得喺facebook問候唔夠，應該直接發電郵問候盧教授。另外亦有網民發起「一人一句問候盧寵茂」行動，唔少人留言響應。

盧偉國指「泄密」做法唔道德

網上所見，好多網民都用粗口「問候」，搞到任建峰要提醒大家，千萬唔好用惡言惡語同人身攻擊，「就願大家放下仇恨，以含忍的心去愛護在手術室上救人無數的盧教授」、「用溫柔細語表達你們的愛會更佳Let us fill him with love」。

另一邊廂，「梁粉」網上平台《港人講地》亦發功，搵人狠批馮敬恩徹底破壞保密制。《港人講地》搵咗立法會工程界議員盧偉國訪問，盧偉國話馮敬恩「泄密」做法唔道德，日後開會時會令大家「言路閉塞」，「以後大家開會，可能在發言前都會顧及會後會被泄露，一些真誠的意見從此難被表達，言路也就閉塞了」。

更多港聞