【明報專訊】香港足球隊與卡塔爾嘅賽事結束，但仍然係唔少人茶餘飯後話題。前晚財爺曾俊華同一班政商界人士都有入場打氣，當晚波飛一票難求，原來財爺等人係坐喺足總保留嘅包廂座，其他嘉賓包括卡塔爾駐港領事館人員，而立法會議員馬逢國、郭偉強等人都在座。 財爺快人一步喺facebook上載球場片段，只見民主黨李華明(阿Fred)坐喺財爺身旁，佢哋仲一齊企起身拍掌打氣。阿Fred話，港隊贊助人詹培忠請佢入場，馬會行政總裁應家柏都坐喺佢身旁。應家柏後生時喺德國做過足球員，所以佢哋一齊好開心講波經。財爺前晚遲咗少少入場，但都睇到港隊下半場嘅拼勁表現，所以全部嘉賓都忘形歡呼。 特首梁振英(CY)前晚無入場，但深夜發網誌讚賞港隊表現。Emily去八卦點解CY唔去撐港隊，而CY嘅理由係，噚日一早要開粵港合作聯席會議，所以一早約咗廣東省長朱小丹前晚工作晚宴，可能因為事忙無法入場。 球迷𠵱家都好期待11月17日嘅香港對中國隊大戰，唔知屆時特區官員去唔去捧場呢？做緊公關工作嘅阿Fred就講笑話，CY屆時唔去好過去，最好係乘機出埠，大條道理唔使去睇波。點解呢？阿Fred話如果到時有人問CY回應有球迷噓國歌，又或者如果香港隊贏咗中國隊，CY可以點回答呢？撐中國隊定係港隊呢？佢話會好尷尬好麻煩喎！
|
| |
| |
;){kind=small}
