空降掃積習 未竟全功已調職 海事處長年半升官

空降掃積習未竟全功已調職海事處長年半升官

[2015.08.27] 發表

【明報專訊】特首梁振英(CY)早排撤換公務員事務局長，間接引發公務員一輪音樂椅調動。其中喺南丫島海難事件後空降去海事處做處長、收拾「爛攤子」嘅黃偉綸(Michael)，做咗一年半處長就由首長D6級，升到D8級嘅發展局常任秘書長(規劃及地政)。Michael會喺8月31日上任，Emily噚日恭喜佢，佢話之前未做過土地規劃部門，一定要畀多啲努力做好新崗位嘅工作。

CY咁重視土地規劃，一切問題都源於「土地問題」，睇嚟Michael未來嘅工作都唔會輕鬆。不過，53歲嘅Michael應該好清楚CY嘅要求，因為佢喺2009年至2014年2月做政府新聞處長，都耐唔耐要跟住CY工作。

黃偉綸升D8 鄭美施掌海事處

南丫島海難後，調查委員會挖出海事處管理好多問題，其後派咗屬於政務官(AO) 嘅Michael去做改革。關注海難事件嘅立法會議員涂謹申就話，海事處積習多年，起碼要幾年時間去執，而Michael去搞咗年半就調走，係有啲可惜，佢話換新處長重新接手，難免會阻慢部門改革。不過，同Michael私交甚篤嘅阿涂話Michael都係有能力嘅人，如果夠鐘升職，調走都無可厚非。

政府今次亦無搵海事處職系嘅人接任處長，繼續空降AO做處長，調咗現任政府物流服務署署長鄭美施喺9月15日接處長，成為部門首個由女掌舵人。同時，現任土地註冊處長周淑貞會喺10月15日接任物流服務署署長。