【明報專訊】「習握手」後人氣高漲嘅財政司長曾俊華，上星期去咗福建3日，考察「一帶一路」機遇，其中一站係去平潭，佢話平潭同香港原來都有淵源。財爺話平潭實驗區管理委員會李德金書記同佢講笑，話說清政府當年同英國人簽訂《南京條約》，慈禧太后考慮應該將平潭定係香港割讓畀英國人，最終就選擇咗「遠的、小的」香港，將較大較近嘅平潭留番。

財爺話，以上故事似係野史多過歷史，但佢去當地考察，話今時今日嘅平潭，喺規劃同政策上確係希望借鑑香港嘅模式，營造一個自由、開放、公平嘅營商環境。講開歷史，財爺話福建係以前海上絲路嘅起點，而𠵱家喺國家「一帶一路」策略下，福建就被選定為「21世紀海上絲綢之路」嘅核心區，話福建發展潛力將會非常巨大。

講開財爺，近日就新聞多多，有傳媒報道佢近期頻約特首選委飯局，話唔知係咪為特首戰開跑。但財爺政助羅永聰就同Emily講，財爺近期無搞乜嘢選委飯局，而佢有同傳媒解釋過，但人哋唔報道佢嘅版本，咁都無計。