【明報專訊】「後政改」首場《城市論壇》火花四起，火頭仲燒埋主持謝志峰嗰度。維園外噚日出現兩個下款為「愛國人士歡輓」嘅花牌，話「黑主持遺臭千古」，仲叫謝志峰「入黃土」，好彩身經百戰嘅謝志峰非常睇得開，百無禁忌，仲話做得傳媒就預咗。

稱做得傳媒預咗

《城市論壇》噚日請咗社民連梁國雄(長毛)、自由黨田北俊、公民黨梁家傑同民建聯李慧琼，唔少建制支持者一早到場「招呼」長毛，每當長毛發言時就喺場外播歌，仲大鬧長毛係「監躉」，最終兩名觀眾被謝志峰趕離場。不過部分撐泛民嘅觀眾都唔弱，有人大鬧李慧琼係「八婆」，同被謝志峰警告。

噚日觀眾嘅離場次序亦有特別安排，由建制支持者先往銅鑼灣方向離場，不過現場建制支持者就無咩反應，最後謝志峰仲細心「翻譯」叫支持李慧琼同田北俊嘅觀眾向西環方向走。