阿松大談有效管治之道

[2015.06.03] 發表

【明報專訊】前財政司長、南豐集團行政總裁梁錦松每一次出席公開活動，都會被追問「會唔會參選特首」，阿松有時會笑笑口唔答，有時就會講「無計劃參選特首」。不過，佢噚日出席嶺南大學籌款晚宴時，就大談「均衡參與和有效管治」之道，向「未來特首」提出七大提升管治嘅建議。他日如果阿松去選特首，唔知佢會唔會力sell呢套管治方式呢？

選特首否? 「最重要政改通過」

阿松噚日又被問到，如果政改通過會唔會選特首，佢話目前最重要就係政改通過，「其他問題不太重要」。

阿松一直都好關心青少年，佢嘅建議中亦不忘邀請年輕人參政。佢話目前有好多經濟同民生狀况令青年不滿，反映時下後生仔關心政治民生，建議政府諮詢機構同立法會可以增加青少年代表嘅比例，讓青少年發聲。

香港行政立法關係緊張，阿松認為由普選產生嘅特首可以邀請有多票源嘅政黨議員出任政府官員，就好似組成一個聯合政府咁，改善行政立法關係。

阿松仲話，保持法治、提升政府行政能力、邀請不同政見人士加入政府諮詢機構、培養政治人才，以及加強同中央政府、廣東省等合作，都係未來特首有效管治香港嘅方法。