【明報專訊】區議會選舉年底舉行，但新民主同盟同民主黨就因為選舉協調隔空開火。新同盟噚日高調開記者會，批評民主黨破壞泛民協調機制，喺協調制度下定出、屬於新同盟「地頭」嘅將軍澳軍寶區插旗，安排民主黨黨員陳展浚喺區內工作。新同盟立法會議員范國威喺記招上手指指怒斥民主黨鵲巢鳩佔。 Emily問過陳展浚，佢話喺軍寶區隔籬嘅富君區做地區工作，但因為將軍澳實在好窄，好難劃界劃得咁清楚。 有無搞錯？ 范國威：睇得好清楚 新同盟怒斥民主黨大黨蝦細黨，民主黨發聲明反駁，話黨一直都尊重區選協調機制結果，至今從無通過任何社區主任出選軍寶區，亦無咁嘅打算。民主黨呼籲同路人放下成見、同仇敵愾，努力爭取真普選。 記招上有記者同范國威講，聽聞陳展浚唔喺軍寶區工作，而係隔籬區，會唔會搞錯？但當時范國威好肯定咁講「絕對唔會發生(搞錯)」，仲話經過長時間觀察，睇得好清楚，「掌握資料先開記招」。 民主動力召集人趙家賢話，選區協調一直都有爭議，建議如果雙方認為仍有需要，應該再出嚟商討解決問題。
|
| |
| |
