馬丁戰友 三料議員文世昌加國病逝
[2015.04.08] 發表
【明報專訊】曾與李柱銘(馬丁)喺1991年攜手參選立法局，成為三料議員嘅文世昌(ManSir)，上星期六喺加拿大病逝，享年70歲。李柱銘對於失去親密戰友感到難過，而當年兩人拍住上參選，「兩條游水魚」勝出，成為一時佳話。
「兩條游水魚」勝出 一時佳話
加國媒體噚日報道，ManSir家人公布ManSir喺4月4日因病去世，喪禮安排喺當地時間18日舉行。ManSir喺1996年移民加國，仍然關心社會，成為時事評論員，評論包括香港佔中事件，又同一班移民當地嘅港人成立「香江情懷」組織。組織成員江大惠接受當地華人電視台訪問時話，ManSir約半年前話腸唔舒服，入過兩次醫院，近半年已經較少露面。
李柱銘就話，想起當年一齊以港同盟(民主黨前身)選立法局港島東兩個議席，當時親中派拉票策略，話既然李柱銘一定贏，咁就應該選其他黨派去平衡吓。李柱銘話當年臨選舉前喺一個選舉論壇上，反駁親中派，話大家去街市買餸請客，如果買兩條魚，會唔會買一條游水魚、一條死魚去平衡呢？選舉結果公布，李、文兩人高票當選，ManSir更同時係區議會、市政局同立法局三料議員。李柱銘話，去年初同陳方安生去加國，都有同ManSir聚會，當時唔覺對方身體有毛病。
加國電視台訪問咗文Sir生前好友蕭顯揚，佢話ManSir早前仲話，香港近期政局紛亂，海外港人就更要保持香港精神、文化，可見ManSir心繫香港。
更多港聞
【明報專訊】民建聯成員、大律師馬恩國（Lawrence），早前以「依法治國訪京團團長」身分去北京，推銷《反港獨法》，但被指建議「古靈精怪」，...
詳情
相關新聞
