【明報專訊】噚日立法會召開特別財委會，運輸及房屋局長張炳良解答議員有關佢政策範疇嘅問題，但變咗議員對罵。民主黨主席劉慧卿開場白首先多謝局長前幾日請食飯，不過工聯會王國興似乎睇唔過眼，話聽到卿姐公開「讚賞」局長請食飯時「毛管戙」，質疑係咪局長請食飯，議員喺審議政策時「疏通啲」。卿姐大大聲指王國興「發噏風」，仲話對方講啲咁嘅說話有失議員身分。

蔣麗芸：民航處要跳舞減壓

司局長同政黨食飯好平常，建制派有時都會同官員食飯啦，王國興喺會上仲話民主黨一向提倡廉潔，聽到卿姐咁講，「真係有點那個」喎。

卿姐除咗直斥王國興「發噏風」，仲強調只係多謝局長而唔係「讚賞」，「我亦係申報，唔好含血噴人」。

除咗卿姐同王國興駁火，民建聯蔣麗芸同社民連梁國雄都有開火。蔣麗芸話民航處職員壓力好大，有間房畀職員「一星期一次跳吓健康舞，有咩大事」。長毛聽到蔣麗芸言論，即刻「嘩」一聲大笑同拍手，兩人都有互相指罵。主席張宇人見狀，就叫議員要謾罵嘅話，不如行出去啦。