C朗變MJ 唔靠替身
廣告出製作特輯

C朗拿度-葡萄牙翼鋒

基斯坦奴朗拿度(C朗)的個人品牌「CR7」早前播放新廣告，只見C朗米高積遜(MJ)上身大獻舞技，擺明宣傳自家品牌的鞋子既靈活又舒適，包保唔頂趾夾腳。品牌昨日推出第二浪攻勢，就是廣告的「making of」，只見C朗認真練舞，一絲不苟，為了「錢」途真的有幾盡去幾盡。

以為這個廣告大都替身上陣，「making of」話你知，其實C朗有幾用心習「舞」。只見他細心觀察舞蹈老師動作，然後放膽練習，聽完導演指示後便在鏡頭前表演，moonwalk、break dance等動作皆難他不倒。C朗雖非跳舞出身，但有賴他平日對身體條件苦練有加，手腳協調和平衡有番咁上下，跳起舞來自然有姿勢有實際，雖然難跟專業「舞」林高手媲美，都表現已算及格。近日他剪了新髮型，卻惹來一致劣評，如今這條廣告製作特輯應該為他挽回不少面子。

新髮型惹劣評

不過，眼利的網民卻找出蝦碌位。「CR7」之所以唔出專業球鞋，改為生產皮鞋和休閒潮鞋，皆因贊助商Nike「詐型」，不過從廣告製作特輯所見，C朗的舞蹈老師並非穿著CR7產品，卻以「一剔」波鞋教C朗跳舞，這是C朗畀面贊助商還是一時冇為意，真係不得而知。