【明報專訊】一年一度嘅花展噚日開鑼，一向鍾意種花草嘅特首夫人梁唐青儀應邀出席開幕禮主禮，Emily留意到梁太披上一條用綠色做主調嘅披肩，未知係咪想襯番啲花草呢？雖然佢喺開幕禮冇致辭，但係主禮剪綵嗰刻，唔少市民都影相留念，連喺台後嘅電視台攝影師大叫市民放低手，唔好遮住鏡頭，但係都無人理。

最近梁太個女齊昕新聞多多，CY又承認齊昕情緒有事，加上齊昕不斷更新社交網站，又話自己離家出走，未曾開腔回應嘅梁太自然成為傳媒追訪對象。不過佢今年就冇好似往年咁主禮完逛一圈花展先走，噚日佢主禮完即刻離開，唔少傳媒蜂擁而上，追問佢對齊昕病情嘅睇法，又問佢有冇同齊昕聯絡，佢全程報以微笑，未有回應，喺10幾個保安護送之下上咗車。