【明報專訊】許仕仁案錯綜複雜，調查歷時4年，早前法官麥機智宣判時都特別讚揚廉署嘅調查工作。噚日Emily喺廉署與傳媒茶敘時見到負責調查此案嘅廉署執行處助理處長余振昌，佢透露初頭查此案時，計埋佢只有3人調查，因為案件好敏感，愈少人知愈好，而就算做到好似余sir咁高級，涉案文件都要親自影印同送件。

後來佢哋搵咗總法證會計師鄧淑妮幫手查吓啲銀行戶口，佢就話睇咗200幾個戶口，涉及7年嘅帳目，星期六日都要返廉署計數，計咗三四個月先重組到成盤數點流動。到正式行動拉人時，就發展至有十幾人幫手。

Emily亦見到喺前廉政專員湯顯明涉貪風波中，被外界批評失職准許部門「分單買酒」嘅社區關係處嘅處長穆斐文。行家問起有指佢快將退休，穆確認話返多兩個星期到3月24日便會退休。退休去向方面，穆斐文話會先休息一段時間，至於會否同老公即政制局副局長劉江華外遊，佢話機會不大，兩公婆過去亦甚少一同外遊。