廠商會擬「過大海」辦工展

廠商會會長李秀恒（右二）噚日主持新春團拜，仲話來年大計希望利用工展會等強大平台，協助青年向上流。（劉焌陶攝）

【明報專訊】每年一次嘅工展會都大受港人歡迎，主辦嘅廠商會計劃未來兩年大展拳腳，「過大海」喺澳門同台灣舉辦。不過，規模就會細啲，大約只有香港嘅五分之一，但係有可能會同當地嘅特色食品品牌合作，一齊擺檔。

會長讚預算案助培養本地人才

廠商會噚日舉行新春團拜，新一屆會董會成員同傳媒拜年。財政司長曾俊華前日公布財政預算案兼大派糖，商界都幾受落。廠商會會長李秀恒大讚預算案務實，仲話相信當中協助本地時裝設計師同I.T界嘅措施，可以幫助培養本地人才。

副會長戴澤良透露，過往工展會都曾經衝出香港，喺哈爾濱同重慶舉行，今年6月就會喺天津舉行。佢又希望今年年底可以喺澳門搞工展會，仲可能會加入港人熟悉嘅澳門品牌。

至於台灣工展會，就希望可以喺台北101大樓附近搞，但因為台灣對食品有嚴格限制，所以需要多啲時間籌備。