【明報專訊】新民黨主席葉劉淑儀大年初二喺車公廟被「麒麟」撞倒，事件到噚日初七都仲講緊，葉太喺立法會內外都有獲問候，而前日擺明飲麒麟啤酒贈興嘅自由黨，該黨張宇人同葉太當面鬥嘴。話說張宇人喺記者面前扮麒麟撞向葉太，葉太反擊話﹕「揩油呀，衰佬！」有番咁上下身材嘅張宇人唔輸蝕，回敬話﹕「揩油？我啲油多過你啦！」

葉太不肯罷休，嘲笑一眾自由黨員應打埋麒麟呔開會喎。除咗張宇人，連醫學界議員梁家騮都扮麒麟撞葉太；又有議員私下建議，應該搵泛民嘅郭家麒同李國麟撞葉太，重演「麒麟」撞葉太一幕。

劉慧卿慰問葉太

雖然咁多人惡搞，但都有人關心葉太，好似民主黨主席劉慧卿噚日上前慰問，葉太大讚對方係最好，事發當日已致電慰問，卿姐又邀請葉太聽晚出席民主黨黨慶一齊飲杯啤酒。議會內，葉太又「傳紙仔」畀民建聯梁志祥，感謝對方為佢講好說話，對方豎起拇指回敬。