【明報專訊】噚日係年宵市場第一日，各個政黨嘅年宵攤位喺烈日下開檔。最早開檔係社民連，佢哋搭咗個電動裝置，卡通版梁振英畀一把黃遮鈎住，吊下吊下放落一個痰罐度，上面仲寫住「梁振英下台」，至於攤位就主打同佔領運動有關嘅雨傘紀念品，有匙扣布袋之類任君選擇。民建聯都唔輸蝕，投到個138號好意頭冧把攤位，大賣「羊」貨。

廠商唔接 公民黨雨傘杯蓋泡湯

至於公民黨嘅攤位就有蕉形黃遮、「鳩嗚」購物袋同撐佔領字句咖啡杯，余若微(Audrey)繼續喺年宵賣字畫同埋自家設計嘅膠file。Audrey話寫咗唔少同佔領運動有關嘅字句，比如歌詞「生於亂世有種責任」，都幾受歡迎，已經畀人買咗唔少，Emily仲聽到噚日有人用咗成5000蚊買Audrey嘅墨寶?！不過佢哋原本係想訂做有雨傘形杯蓋嘅水杯，但內地好多工廠都唔肯接單，最終要改做字句膠咖啡杯。毛孟靜就話今年係區議會選舉，希望年宵可以籌到錢支持後生一輩，幫補吓參選經費咁話。

民建聯都唔輸蝕，除咗攤位冧把138號好意頭，仲請咗「三羊」主禮，分別係姓楊嘅中聯辦社工部部長楊茂、教育局副局長楊潤雄同民建聯楊耀忠。攤位賣羊暖包、環保花樽同金色羊擺設等應節，民建聯主席譚耀忠就話新年願望係議員唔好拉布，盡快通過創新科技局，同埋可以一人一票選特首喎。