【明報專訊】六七暴動過咗好多年，呢件事對立法會主席曾鈺成一家影響好大，細佬妹都被警察拉咗。曾主席回首往事，話當年阿媽日日以淚洗面好擔心，但佢話佢哋幾兄妹見到六七年政府出動防暴隊，放催淚彈又打人「好狼」，做法「同嗰陣時一樣」，令佢哋好反感，所以佢同細佬妹都企喺同情示威者一邊。

弟妹被捕 「阿媽幾日日匿埋喊」

曾鈺成接受立法會議員蔣麗芸(Ann姐)嘅《蔣麗芸會客室》訪問，講番六七暴動，當年佢讀緊香港大學，而讀聖保羅書院嘅細佬曾德成因派傳單同情示威工人被捕，坐咗兩年監，讀庇理羅士女子中學嘅細妹一樣被捕。曾主席話呢件事對父母打擊好大，「阿媽幾乎匿埋日日喊」，阿爸亦好擔心。

佢話曾家係典型基層家庭，阿爸做兩份工養家。曾主席話佢哋三兄妹係喺「偶然機會」接觸到啲左派團體，六七年時工人罷工觸發暴動，曾主席語帶雙關，話六七年同早前一樣，防暴隊放催淚彈，又話警察「好狼」咁打人，所以佢哋好反感。佢話現任民政局長嘅細佬曾德成當年只係喺學校派吓傳單，又無放炸彈或打人，但學校都報警拉人。

事後曾主席一家被視為「左仔」，而Ann姐喺節目一開頭就笑曾主席係「傳奇人物」，由當年不受歡迎人物、選輸過立法局，變成?家十大議員之首。不過，曾主席即反駁，講笑話「點解話我以前不受歡迎呀？我連續咁多屆選舉，票數都唔少喎」。